കണ്ണൂര്‍ക്കാരന്റെ ചിന്തകള്‍

ഏനും തമ്പ്രാനും !

2011-03-06T12:49:00.001+08:00

"വല്യേമ്പ്രാന്‍ വന്നെരിക്ക്ണ്ണ്‍..നാലഞ്ചു ദിവസം കാണും ഇബടെ.."

പോയ ഒരു കൊല്ലം പറഞ്ഞതും നടന്നതും കണ്ടതും എല്ലാം ഇനി പവര്‍ പോയിന്റാക്കണം! രണ്ടു ദിനം വല്യേമ്പ്രാന്റെ പുറകെ റാന്‍ മൂളി നടക്കണം..അവനോന്‍ ചെയ്യാനുള്ള പണി വേറെയും!

മമചരിതം ഒന്നാം ദിവസം..കേളികൊട്ട്..വല്യേമ്പ്രാന്‍ ഒന്നാം പോയിന്റിനു തന്നെ കയറിപ്പിടിച്ചു...

"നിന്നോടു കഴിഞ്ഞ കൊയ്ത്തിനു പറഞ്ഞതല്ലേ പോരാ പോരാന്ന്.. എന്താ ഇക്കൊല്ലൂം ഇങ്ങനെന്ന്യാ?"

"അത് തമ്പ്രാ...ചെറിയമ്പ്രാട്ടി പറഞ്ഞു ഇങ്ങനെ ചെയ്തില്ലേല്‍ പിന്നെ കഞ്ഞീം വെള്ളോം ചോയ്ച്ച്ചോണ്ട് ഇങ്ങോട്ട് ബരണ്ടാന്ന്‍.. അട്യേന് ബേറെ ബയിയില്ല തമ്പ്രാ "

"അങങ്ആ...അങ്ങനെ വരാന്‍ വഴിയില്ലല്ലോ..വിളി ഓളെ.."

കാര്യസ്ഥന്‍ നാണ്വായര്‍ ഫോണിട്ടു കറക്കി...ചെറിയമ്പ്രാട്ടിയുടെ കാര്യസ്ഥ അങ്ങേത്തലക്കല്‍.." അതെ നാണ്വായരേട്ടാ..ചെറിയമ്പ്രാട്ടി സ്ഥലത്തില്ല..ലാറ്റിന്‍ കത്തോലികന്‍ സംസ്ഥാന സമ്മേളനം കൂടാന്‍ ലാറ്റിനമേരിക്കയില്‍ പോയിക്ക്ണ്‌.. രണ്ടാഴ്ചത്തേക്ക് നോക്കണ്ട.."

'എന്നാ വൈകിട്ട് കൂടുവല്ലേ'ന്നുള്ള ചോദ്യം വല്യേമ്പ്രാന്റെ നോട്ടത്തില്‍ ഉരുകി വെള്ളമായി, നാണ്വായരുടെ തൊണ്ടയില്‍ തന്നെ പരന്നു! ഇളിഭ്യത മറക്കാന്‍, മടിക്കുത്തില്‍ നിന്ന് കഷണം പാക്കടക്ക എടുത്ത്‌ വായിലേക്കിട്ടു!

വല്യേമ്പ്രാന്റെ നോട്ടം പിന്നേം പോയിന്റിലെക്കായി..

'ഉം.. നീ ബാക്കി പറ..'.. എന്നിട്ട് തൊട്ടടുത്തിരിക്കുന്ന കുഞ്ഞമ്പ്രാനോടു മെല്ലെ ' കാര്‍ണിവല്‍ ആവുമ്പം ഓള്‍ക്ക് പതിവുള്ളതാ തറവാട്ട് വക ഒരു ബ്രസീല്‍ യാത്ര! "..

Copy Machines, a Security Risk?

2011-02-26T15:47:00.000+08:00

കാഴ്ചയുടെ നിറവസന്തം.....

2010-07-21T22:12:00.009+08:00

ക്യാമറാ പരീക്ഷണം (ഫോട്ടോ)

2008-01-27T07:46:00.000+08:00

ഈ പരീക്ഷണത്തിന്‍ ആദ്യം വേണ്ടത് ഒരു പിപ്പറ്റ്, രണ്ട് ബ്യൂററ്റ്, 2 ലിറ്റര്‍ പൊട്ടാസ്യം പെര്‍മാംഗനേറ്റ്, 100മി.ലി. സള്‍ഫ്യൂറിക് ആസിഡ് (ഹൊ എന്ത് കഷ്ടാണ്‍ ഈ തരം വാക്കുകള്‍ മലയാളത്തില്‍ എഴുതാന്‍. വെറുതെയല്ല, ജപ്പാന്‍‌കാരും ചൈനക്കാരും ഇതിനൊക്കെ അവരുടെ ഭാഷയില്‍ വേറേ പേരിട്ടത്!) ആണ്‍. ഇതു കൂടാതെ ഒരു ക്യാമറയും, ഒരു മെഴുകുതിരിയും വേണം.

ആദ്യം മെഴുകുതിരി കത്തിക്കുക. എന്നിട്ട് അതിന്റെ ഫോട്ടോയെടുക്കുക. നന്നായില്ലെങ്കില്‍ നന്നാവുന്നത് വരെ തുടരുക. ഇതാ ഒരു സേമ്പിള്‍!

ഇനി ഇതാ ഈ താഴെ കാണുന്നത് പോലെ വേറൊരു ഫോട്ടോ പിടിക്കുക. എങ്ങനെയെന്ന് നിങ്ങള്‍ തന്നെ തീരുമാനിക്കുക. പറഞ്ഞ് തരണമെന്നുണ്ട്, പക്ഷെ എനിക്കും അറിയില്ല!

ഇനിയാണ്‍ ഏറ്റവും സൂക്ഷിച്ച് ചെയ്യേണ്ട കാര്യം..ആദ്യം എടുത്ത പിപ്പറ്റും ബ്യൂററ്റും ഒക്കെ യാതൊരു അപകടവും സംഭവിക്കാതെ എടുത്തിടത്ത് തന്നെ തിരിച്ച് വെക്കുക.
ഏത് ക്യാമറ കിട്ടിയാലും അത്കൊണ്ട് എന്തെങ്കിലും കൊനുഷ്ട് പടമെടുത്ത് ആളെ പേടിപ്പിക്കുന്ന എന്റെ സ്വന്തം അനിയനാണ്‍ ഇതിന്റെയും പുറകില്‍! അതുകൊണ്ട് ഇത് അവന്‍ വെടിക്കെട്ട് ചെയ്യുന്നു :)

ഞാന്‍ കാണാത്ത ഇന്ത്യ

2008-01-26T22:45:00.000+08:00

സായ്‌നാഥിന്റെ “Everybody Loves a Good Drought” എന്ന പുസ്തകത്തെപ്പറ്റി എഴുതിയത്.

ഇംഗ്ലീഷ് പുലികളി

2007-12-09T11:11:00.000+08:00

“ദെന്തൊരു കളറാടാ ഇത്, വേറെ സോക്സൊന്നും ഇല്ലേ ഇടാന്‍. പുലികളിക്ക് പോണ പോലുണ്ടല്ലോ”

“വാട്ടിസ് ദിസ് പുളികളി?”

“പുളികളിയല്ലടാ, പുലികളി..പുലികളി.”

“വാട്ടിസ് ദാറ്റ്? ടെല്‍ മി ഇന്‍ ഇം‌ഗ്ലീഷ്“

“ (ആത്മഗതം : തൊലഞ്ഞു ! ഇതിന്റെ ഇം‌ഗ്ലീഷ് പേര്‍ എവിടെപ്പോയി കണ്ടുപിടിക്കും? വല്ല ടൈഗര്‍ ഗെയിം‌ന്നോ മറ്റോ പറഞ്ഞാലോ..അല്ലെങ്കില്‍ വേണ്ട, അത് പറഞ്ഞാ അത് വെച്ച് അവന്‍ ഗൂഗിള്‍ ചെയ്താ നമ്മടെ കാര്യം കഷ്ടത്തിലാവും!) ഒന്നൂല്ല നീ ആ സോക്സ് തന്നെ ഇട്ടോ!“

“താങ്ക് യൂ”!

ഇംഗ്ലീഷ് പഠിക്കണെങ്കില്‍ പിള്ളാരെ ബോറ്ഡിംഗ് സ്കൂളില്‍ വിടുന്നതാണ്‍ നല്ലത് (തന്തമാര്‍ക്ക് നല്ലത്!) എന്ന് പറഞ്ഞ ആ മഹാന്‍ ഒരു ദീര്‍ഘദര്‍ശി തന്നെ!

സിംഗപ്പൂരിലേക്ക് ഒരു എത്തിനോട്ടം..(ഫോട്ടോ പോസ്റ്റ്)

2007-11-25T19:48:00.000+08:00

ദിസ് കൈമള്‍: ഫോട്ടോ പോസ്റ്റ്ന്നൊക്കെ കേട്ട് ഓടിവരുന്നവരുടെ ശ്രദ്ധക്ക്.

എത്രയായാലും ഫോട്ടോ എടുത്തത് ഞാനാണേ. അമിതപ്രതീക്ഷ അരുത്! :)

ന്നാ തൊടങ്ങ്വല്ലേ..

മൂന്ന് നാലു വര്‍ഷം മുമ്പ് അമേരിക്കയിലെ ഒരു Domestic വിമാനയാത്രയില്‍, കൂടെയുണ്ടായിരുന്ന സായിപ്പ് ലോഹ്യം കൂടാന്‍ വന്നു. ഞാന്‍ സിംഗപ്പൂരില്‍ നിന്നാണെന്ന് പറഞ്ഞപ്പോള്‍ അങ്ങോര്‍ക്ക് അപാര സന്തോഷം. “ചൈനയില്‍ ഇപ്പോ നല്ല തണുപ്പാരിക്കും അല്ലേ” തുടങ്ങി ചോദ്യങ്ങളെല്ലാം ചൈനയെ തൊട്ടോണ്ടായിരുന്നു. ഇയാളെന്തിനാ എന്നോട് ചൈനയെ പറ്റി പറയുന്നത് എന്നെനിക്ക് മനസ്സിലാവാത്തതുകൊണ്ട്, അവിടെയും ഇവിടെയും തൊടാതെ ഉത്തരം കൊടുത്തു. കുറച്ച് കഴിഞ്ഞപ്പോള്‍ സംഗതി കത്തി! സിംഗപ്പൂര്‍ എന്നത് ചൈനയിലെ ഒരു നഗരമാണെന്നാണ്‍ സായിപ്പിന്റെ ചിന്ത! അമേരിക്കക്കാരുടെ (കു)പ്രശസ്തമായ,ലോകവിവരത്തിനെ പറ്റി പറഞ്ഞാല്‍ തീരുന്ന വിഷയമേ ഉള്ളൂ അത് എങ്കിലും, സിംഗപ്പൂരിനെ പറ്റി പലര്‍ക്കും പല തെറ്റിദ്ധാരണകളും ഉണ്ട് എന്നുള്ളത് സത്യം മാത്രം. “Singapore is a fine city... For spitting fine 2000$, for littering fine 3000$ " ന്നെഴുതിയ T-Shirt കണ്ടിട്ടുണ്ട്! അത്രക്കൊന്നും ഇല്ലെങ്കിലും നിയമം ഉണ്ടാക്കിക്കഴിഞ്ഞാല്‍ 100% അത് എല്ലാവരും പാലിക്കണം എന്നത് അച്ചട്ട്! പലനിയമങ്ങളും ഇന്ത്യന്‍ പീനല്‍ കോഡില്‍ നിന്ന് അതേ പടി പകര്‍ത്തിയതാണത്രേ, പക്ഷെ പറഞ്ഞിട്ടെന്താ ആ നിയമങ്ങളൊന്നും ഇന്ത്യയില്‍ നമ്മള്‍ കേട്ടിട്ട് കൂടി ഉണ്ടാവില്ല!

Anyway, എനിക്ക് സിംഗപ്പൂരിന്റെ കുറച്ച് ഫോട്ടോ പോസ്റ്റണം. നിങ്ങളങ്ങിനെ ചുമ്മാ ഫോട്ടോ കാണണ്ട, എന്റെ വക അല്പം ബോറടിയും കൂടെ നടക്കട്ടെന്ന് കരുതിയാണ്‍ തുടങ്ങിയത്. ഇപ്പോ എനിക്ക്തന്നെ മടുത്തു! എന്നാ ഫോട്ടോ കാണ്വല്ലേ..

ഇത് സിംഗപ്പൂരിന്റെ മുഖമുദ്രയായിട്ട് എവിടെയും കാണിക്കാറുള്ള “Esplanade"! ഗംഭീരന്‍ ഒരു തിയേറ്ററാണിത്. Durian ന്റെ ആകൃതിയില്‍ ഉണ്ടാക്കിയ ഈ കെട്ടിടത്തിന്റെ രാത്രി ദൃശ്യം അതിഗംഭീരമാണ്‍. ഇതാ താഴെ കാണൂ.

വര്‍ഷങ്ങളോളം പ്ലാന്‍ ചെയ്തിട്ടാണ്‍ ഇവിടെ ഓരോ റോഡും കെട്ടിടങ്ങളും ഉണ്ടാക്കുന്നത്. കുറ്റമറ്റവിധം ഇങ്ങിനെ ഒരു concrete നഗരം ഉണ്ടാക്കുക എന്നത് ചില്ലറക്കാര്യമല്ല.

പക്ഷെ പറഞ്ഞിട്ടെന്താ, മുകളിലേക്ക് കയറികയറി ഇപ്പം ആകാശം മുട്ടാറായി. അതുകൊണ്ടിപ്പം നഗരവികസനം നടക്കുന്നത് മണ്ണിന്റെ അടിയിലാണ്‍. കിലോമീറ്ററുകളോളം ട്രൈയിന്‍ പാത ഇപ്പോള്‍ ഭൂമിക്കടിയിലാണ്‍. വീണ്ടും കുറെ പണി നടന്നു കൊണ്ടിരിക്കുന്നു. ഇരുപത്താറാം നിലയിലെ എന്റെ ഓഫീസില്‍ നിന്നു നോക്കുമ്പോള്‍ ഇടക്കിടക്ക് അവിടെയും ഇവിടെയുമായി ഓരോന്ന് പൊട്ടിമുളക്കുന്നത് കാണാം- റെയില്‌വേ സ്റ്റേഷനേ!

സിംഗപ്പൂര്‍ ടൂറിസത്തിന്റെ ഏത് ബ്രോഷറ് എടുത്താലും ഉണ്ടാവും ഒരു Merlion ഫോട്ടോ അതില്‍. കാണാന്‍‌മാത്രം ഒന്നും അതിലില്ല. എന്നാലും മണിക്കൂറുകളോളം യാത്ര ചെയ്ത് ക്ഷീണിച്ച് വരുന്ന ടൂറിസ്റ്റുകളെ ഒന്നൊഴിയാതെ ഇവിടെ കൊണ്ടു വന്ന് “ഹൂ ഹാ” ന്ന് പറയിപ്പിക്കാന്‍ ഇവിടത്തെ ടൂറ് ഓപ്പറേറ്റര്‍മാര്‍ പെടുന്ന പാട് അപാരം!

സിംഗപ്പൂരിന്റെ ഏറ്റവും വലിയ വെല്ലുവിളിയായിരുന്നു പാര്‍പ്പിടപ്രശ്നം. അതിമനോഹരമായി അവരത് കൈകാര്യം ചെയ്തു- HDB എന്ന പ്രസ്ഥാനം വഴി! തീപ്പെട്ടിക്കൂട്പോലുള്ള ഈ estate കള്‍ കാണൂ.. കാണുന്നപോലെയല്ലാട്ടോ, മനോഹരമാണ്‍ കെട്ടിടങ്ങളുടെ അകവും പുറവും

സിംഗപ്പൂരിന്റെ എടുത്ത് പറയാവുന്ന വേറൊരു പ്രത്യേകത ഇവിടുത്തെ പാര്‍ക്കുകളുടെ എണ്ണമാണ്‍. അവ ഭംഗിയായി സൂക്ഷിക്കുന്നതില്‍ എല്ലാവരും കാണിക്കുന്ന ഉത്സാഹവും വേറെവിടെയും കാണാത്തത് തന്നെ.
താഴെ : കല്യാണപന്തലില്‍ നിന്ന് ഒളിച്ചോടിയ നവമിഥുനങ്ങള്‍, ദേ പാര്‍ക്കില്‍!

മനോഹരമായ ഒരു ശില്‍പ്പം.

താഴെ - ‌ ഭാര്‍‌ഗ്ഗവീറോഡ് (ഭാര്‍ഗ്ഗവീനിലയംസ്റ്റൈല് :))

സിംഗപ്പൂരില്‍ , വീട്ടില്‍ പൂച്ചയെ വളര്‍ത്താന്‍ പാടില്ലാന്ന് നിയമമുണ്ട്. പക്ഷെ പട്ടിയെ വളര്‍ത്താം. ( ഹോങ്കോങ്ങില്‍ നേരെ തിരിച്ചാണ്‍!:)) വളര്‍ത്തിക്കൂടാന്നുണ്ടെങ്കിലും പൂച്ചകള്‍ക്ക് യാതൊരു കുറവുമില്ല!

താഴെ: വീടില്ലേലും ഞങ്ങള്‍ക്കും ജീവിക്കേണ്ടേ സാര്‍

ഇനി, നാളെ സിംഗപ്പൂരിനോട് വിടപറഞ്ഞ് പോകുന്ന നിഷ്കളങ്കന്‍ എന്ന ബ്ലോഗര്‍ സുഹൃത്തിന്‍ എന്റെ വക.

തവളക്കാല്‍.

2007-11-20T22:36:00.000+08:00

“12 അങ്ങനെ മോശെയും അഹരോനും ഫറവോന്റെ അടുക്കല്‍നിന്നു ഇറങ്ങി ഫറവോന്റെ മേല്‍ വരുത്തിയ തവളനിമിത്തം മോശെ യഹോവയോടു പ്രാര്‍ത്ഥിച്ചു.
13 മോശെയുടെ പ്രാര്‍ത്ഥനപ്രകാരം യഹോവ ചെയ്തു; ഗൃഹങ്ങളിലും മുറ്റങ്ങളിലും പറമ്പുകളിലും ഉള്ള തവള ചത്തുപോയി.
14 അവര്‍ അതിനെ കൂമ്പാരംകൂമ്പാരമായി കൂട്ടി; ദേശം നാറുകയും ചെയ്തു. “

തവളക്കാല്‍ വില്‍ക്കാന്‍ വെച്ചത് ആദ്യമായിട്ടാണ്‍ കാണുന്നത്. വില കണ്ടപ്പോള്‍ ഞെട്ടി! എന്നാപ്പിന്നെ നിങ്ങളും ഞെട്ടിക്കോട്ടേന്ന് കരുതി പോസ്റ്റുന്നു!

ബദലപ്പാ

2007-09-22T16:48:00.000+08:00

വക്കാരിയുടെ തുരുത്തിനൊരു തിരുത്ത്.!!!

തേങ്ങയും ആരോഗ്യവും!

2007-09-08T21:55:00.000+08:00

സിംഹപുരി ഗവണ്മെന്റിനൊരു പ്രത്യേകതയുണ്ട്. എന്തേലും ഒരു സാധനം കൊള്ളില്ലാന്ന് ആരെങ്കിലും പറഞ്ഞാല്‍ ഉടനെ അത് കാര്യമായി നാട്ടുകാരെ അറിയിക്കും. തേങ്ങയും തേങ്ങാപ്പാലും വെളിച്ചെണ്ണയും കഴിച്ചാല്‍ തട്ടിപ്പോകാന്‍ വേറെ പ്രത്യേകിച്ച് ഒന്നും ചെയ്യണ്ട എന്ന് ആരോ പറഞ്ഞു, എന്നാ അത് നാലാളെ അറിയിക്കാംന്നും വെച്ചു, ബോറ്ഡും വെച്ചു. അത്ര തന്നെ.. നാട്ടുകാര്‍ക്ക് പിന്നെ എന്തുവേണേലും അവനവന്റെ യുക്തം പോലെ ചെയ്യാം!

എന്തായാലും തേങ്ങയും വെളിച്ചെണ്ണയുമില്ലാതെ നമ്മള്‍ മലയാളികള്‍ക്ക് എന്ത് ജീവിതം! പിന്നെ നമ്മളെപ്പോലുള്ളവന്‍ തട്ടിപ്പോയാലും സിംഗപ്പൂരിന്‍ ഒരു തേങ്ങേമില്ലാന്ന് സിംഗപ്പൂരും!

ചന്ദ്രേട്ടന്റെ ഈ പോസ്റ്റ് കണ്ടപ്പോളാണ്‍ ഇത് പോസ്റ്റാന്‍ തോന്നിയത്!

ഇതിഹാസ പുരാണങ്ങളിലെ ചില കാണാപ്പുറങ്ങള്‍

2007-09-06T23:04:00.000+08:00

Prof. സി.ജി നായര്‍ മട്ടന്നൂരിന്റെ ഇതിഹാസ പുരാണങ്ങളിലെ ചില കാണാപ്പുറങ്ങള്‍ എന്ന പുസ്തകം വായിച്ചപ്പോള്‍ എനിക്ക് തോന്നിയത് ഇവിടെ കുറിച്ചിരിക്കുന്നു.

ദ ആല്‍കെമിസ്റ്റ് - പൗലോ കൊയ്‌ലോ

2007-09-02T00:17:00.000+08:00

ആല്‍കെമിസ്റ്റ് എന്ന പുസ്തകത്തെപ്പറ്റി നാലു വാക്ക്. ഇവിടെ വായിക്കാം

പിഎസ്: ആ ബ്ലോഗില്‍ പോസ്റ്റ് ചെയ്യുന്നതൊന്നും തനിമലയാളത്തില്‍ എത്തുന്നില്ല. അതുകൊണ്ടാണ്‍ ഈ ഡബിള്‍ പോസ്റ്റിങ്ങ്! :)

ദൈവത്തിന്റെ നാട്ടില്‍

2007-08-23T22:28:00.000+08:00

സിംഹപുരിയില്‍ ഇന്ന് വൈകുന്നേരം നല്ല മഴയായിരുന്നു. കനത്ത മഴയില്‍ ഓഫീസിന്റെ ജനലിലൂടെ കടലില്‍ മഴ പെയ്യുന്നതും നോക്കിയിരുന്നു. ഡോക്ക് കിട്ടാതെ കടലില്‍ അവിടവിടെയായി കിടക്കുന്ന കപ്പലുകള്‍ . പെട്ടെന്നാണ്‍, പണ്ട് പെരുമഴയത്ത് കുളത്തില്‍ കുളിക്കുന്നത് ഓര്‍മയിലെത്തിയത്! അത് ആലോചിച്ചപ്പോള്‍ മൊത്തം കുളിരു കോരി! ജീവിതത്തിന്റെ സുവറ്ണ്ണകാലം.. ഇനി അതൊന്നും തിരികെ കിട്ടില്ലല്ലോന്നോര്‍ത്തപ്പോള്‍ വന്ന സങ്കടം പറഞ്ഞറിയിക്കാന്‍ വയ്യ.

കടലാസ് തോണി ഉണ്ടാക്കുന്നതില്‍ എന്റെ വൈദഗ്‌ധ്യം ഇന്നെങ്ങിനെ ആള്‍ക്കാരെ പറഞ്ഞു മനസ്സിലാക്കിപ്പിക്കും ! കുറെ കഷ്ടപ്പെടേണ്ടിവന്നു ഇതിനിടെ ഒന്നുണ്ടാക്കിയെടുക്കാന്‍!

ഹോളി കൗ - ഒരു പുസ്തകപരിചയം

2007-08-22T23:25:00.000+08:00

ഹോളി കൗ ഒരു പുസ്തക പരിചയം

ചില സ്വാതന്ത്ര്യ ദിന വായന..

2007-08-15T23:18:00.000+08:00

ഇന്ത്യയോട് വളരെ അടുത്ത് കിടക്കുന്ന രാജ്യമാണെങ്കിലും സിംഗപ്പൂരില്‍, ഇന്ത്യയെ സംബന്ധിക്കുന്ന പുസ്തകങ്ങള്‍ കുറവായേ വാങ്ങാന്‍ കിട്ടു‍. ഇത്തവണ എന്തോ കുറച്ചെണ്ണം ഒന്നിച്ച് കിട്ടി! ‘സ്വാതന്ത്ര്യ ദിന‘ സീസണ്‍ വില്പന ആണൊ എന്തോ!

സ്ത്രീപക്ഷവായനക്കാര്‍ക്കായിട്ട് ഒരു സ്പെഷല്‍ അനൌണ്‍‌സ്മെന്റ് : Holy Cow വായിച്ചിട്ടില്ലെങ്കില്‍ നിങ്ങളുടെ ജീവിതത്തിന്റെ പകുതി വെറുതെ പോയതായി കണക്കാക്കുക! :)

എല്ലാവരും പതാക പോസ്റ്റുമ്പോള്‍ ഞാനും എന്തേലും ചെയ്യണ്ടേന്ന് കരുതി ചെയ്തതാ.. എന്നെ തല്ലരുത്. വെറുതെ നോക്കിയാല്‍ തന്നെ മതി. ഞാന്‍ നന്നായിക്കോളും!

പറശ്ശിനിക്കടവ് ...

2007-07-20T20:09:00.000+08:00

എപ്പ നാട്ടില്‍ പോയാലും ഒരു സന്ദര്‍ശനം പതിവുള്ളതായിരുന്നു. ഇത്തവണ അത് മുടങ്ങി! Design ഹാന്‍ഡ്‌ബുക്കിന്‍ പകരക്കാരനായി നിന്നതാണ്‍ പറശ്ശിനിക്കടവു പുഴ കുറെക്കാലം. ഹാന്‍‌ഡ്‌ബുക്ക് എടുത്തില്ലെങ്കില്‍ ക്ലാസില്‍ കയറണ്ടാ എന്നത് പ്രൊഫസറുടെ കല്ല് പിളര്‍ക്കുന്ന കല്പനയാണേ.പിന്നെ പുഴയും നോക്കിയിരിക്കലല്ല്ലാതെന്തു ചെയ്യാന്‍! ‘ഉച്ചക്ക് ഫ്രീയായി ഊണ്‍‌ കിട്ടും‘ന്ന് ഉണ്ടെങ്കില്‍ എന്തു പണ്ടാരം വേണമെങ്കിലും മറക്കാന്‍ ഞാന്‍ റെഡി! :)
അങ്ങനെ ഉള്ള നമ്മടെ പറശ്ശിനിക്കടവു പുഴയും പാലവും ഇന്ന് കൊച്ചുത്രേസ്യയുടെ ലോക ത്തില്‍ കണ്ടപ്പോള്‍ കുറച്ചുനേരം അതു നോക്കി നിന്നു.
എന്തായാലും ഞാന്‍ കണ്ടപ്പോള്‍ ഉള്ള ആ പുഴ ഇതാ ഇവിടെ

പ്രത്യേകിച്ച് പറയേണ്ടല്ലോ, കൊച്ചുത്രേസ്യക്ക് നൂറായിരം നന്ദി!

വീണ്ടും ഒരദ്ധ്യയനവര്‍‌ഷം..

2007-06-03T23:04:00.000+08:00

അങ്ങനെ വീണ്ടും ഒരു ജൂണ്‍ തുടങ്ങുകയായി.
പ്രൈമറിസ്കൂളിനടുത്തായിരുന്നു എന്റെ വീട്. സ്കൂള്‍ തുറക്കാറായി എന്നത് ഞങ്ങള്‍ക്ക്, ബാക്കിയുള്ളവരെക്കാള്‍ കുറച്ചധികം സങ്കടം ഉണ്ടാക്കുന്ന ഒന്നായിരുന്നു. കഴിഞ്ഞ രണ്ടുമാസമായി ഞങ്ങളുടെ സ്വന്തം കളിസ്ഥലമായിരുന്ന സ്കൂളിന്‍ ഇനി വേറെ കുറെ അവകാശികള്‍ വരുന്നു എന്നതായിരുന്നു വലിയ പ്രശ്നം! പരീക്ഷാ കാലത്ത് കുട്ടികള്‍ വെള്ളം കൊണ്ട് വന്ന് മറന്നുവെച്ചുപോയ കുപ്പികള്‍ എറിഞ്ഞുടക്കുക, ക്ലാസുകളെ വേറ്തിരിക്കുന്ന തട്ടികള്‍ക്ക് അപ്പുറവും ഇപ്പുറവും നിന്ന് പേപ്പറ് ചുരുട്ടിയുണ്ടാക്കിയ പന്ത് കൊണ്ട് വോളീബോള്‍ കളിക്കുക, അങ്ങനെ എന്തിനും ഏതിനും, മതിലും കാവലുമില്ലാത്ത സ്കൂളായിരുന്നു ഞങ്ങളുടെ സ്വൈരവിഹാരകേന്ദ്രം! മതില്ക്കെട്ടിനകത്തലാത്ത സ്കൂളുകള്‍ കണ്ട കാലം മറന്നു!

നാട്ടിലെ സാധാരണക്കാരന്റെ സങ്കല്പത്തിലെ സ്കൂളിനും ഇന്ന് കുറെ മാറ്റങ്ങള്‍ വന്നു എന്നത് സത്യം. ഇപ്പോ ഏഷ്യാനെറ്റ് വാര്‍ത്തയില്‍ ഒര‍ച്ഛന്‍ (മകനെപറ്റി) പറഞ്ഞുകേട്ടു “കട്ട് മോട്ടിച്ചിട്ടാണേലും ഇവനെ നന്നായി പഠിപ്പിക്കണം“ന്ന്. നേരാംവണ്ണം പണിയെടുത്തുണ്ടാക്കിയതൊന്നും പോരാന്നുള്ള തിരിച്ചറിവ്!

കണ്ണന്റെ പ്ലേസ്കൂളിലെ ആദ്യ ടേമിന്റെ ഫീസ് കൊടുക്കേണ്ടിവന്നപ്പോള്‍ ഞാന്‍ ഒന്ന് കണക്കു കൂട്ടി നോക്കി. ആ പണം കൊണ്ട് എന്റെ എഞ്ചിനീയറിങ്ങ് വരെയുള്ള പഠനച്ചെലവ് നടന്നിരുന്നു! ഇതിനെപ്പറ്റി പറഞ്ഞപ്പോള്‍ ഒരു സുഹൃത്ത് പറഞ്ഞു ‘അതിനിപ്പോ, അച്ഛന്‍ പഠിച്ചതൊന്നുമല്ലല്ലോ മകന്‍ പഠിക്കുന്നത്’.‘ ശരിയാണല്ലോന്ന് കരുതി ഞാനും സമാധാനിക്കുന്നു!

ഓടോ:

"ഭാരതമെന്ന പേര്‍ കേട്ടാലഭിമാനപൂരി...”

അമ്മേ, നാളെ രാവിലെ പൂരി ആക്കിത്തര്‍വോ..

അറുമുഖവും അമേരിക്കയും

2007-05-31T13:54:00.000+08:00

കുറച്ചുതവണയായി ഇതു കേള്‍ക്കുന്നു.

“ഡായ്.. ഓയ്”

MRT യിലെ രാവിലത്തെ തിരക്കിനിടക്ക് ഒരു കമ്പാര്‍ട്മെന്റിന്റെ വാതില്‍ക്കല്‍ നിന്ന് ഒരുത്തന്‍ ആരെയോ കൂവി വിളിക്കുകയാണ്‍. ഏതെങ്കിലും തമിഴനായിരിക്കും -ഉറപ്പ്. ഇവന്മാറ്ക്ക് മെല്ലെ സംസാരിക്കാന്‍ അറിയില്ലല്ലോ! മൂന്നുനാലു വിളികഴിഞ്ഞിട്ടും നിര്‍ത്താന്‍ ഭാവമില്ല വിളിക്കുന്നവന്‍. എന്നാലീ മഹാനെ ഒന്നു കണ്ടുകളയാം എന്ന് വിചാരിച്ചിട്ടാണ്‍ വിളിക്കുന്നവനെ ഒന്നു തലയുയര്‍ത്തി നോക്കിയത്. ഞടുങ്ങിപ്പോയി... എന്റെ നേരേ നോക്കിയിട്ടാണോ ഭഗവാനേ ഈ വിദ്വാന്‍ ഇങ്ങനെ കാറുന്നത്? വായിച്ചുകൊണ്ടിരിക്കുന്ന പുസ്തകത്തിന്റെ ഇടയിലൂടെ ഒളിഞ്ഞൊന്നു നോക്കി..അതേ...ഇതവന്‍ തന്നെ .. അറുമുഖം!

കാലം കുറെ പിറകോട്ടടിച്ചു!
*****************************

അമേരിക്കക്കാര്‍ മനുഷ്യന്മാരെ പേടിക്കാന്‍ തുടങ്ങുന്നതിനു മുന്‍പ്.. ക്ലിന്റണും ലെവിന്‍സ്കിയും ആ നാട് സുഖമായി ഭരിച്ചുകൊണ്ടിരിക്കുന്ന സമയം..അപ്പോഴായിരുന്നു ഒരു ഐടി പ്രൊജക്റ്റിന്റെ കോപ്പ് (ഇംഗ്ലീഷില്‍ എഴുതുമ്പോള്‍ Scope എന്നെഴുതും, പക്ഷെ, S സൈലന്റാ!) പഠിക്കാനായിട്ട് മൂന്നുപേരെ കമ്പനി മദ്രാസില്‍ നിന്ന് ന്യൂയോര്‍ക്കിലേക്ക് വണ്ടി കയറ്റി വിട്ടത്. അമേരിക്കക്കാരുടെ കണ്ണ് തള്ളിച്ച പ്രകടനമായിരുന്നു പിന്നങ്ങോട്ട്!

രാവിലെ നിത്യം വേള്‍ഡ് ട്രെയിഡ് സെന്ററില്‍ ട്രയിന്‍ ഇറങ്ങി നടന്നുപോകണം ‘ഹാനോവറ് സ്ക്വയറി‘ലേക്ക്. ആദ്യ ദിവസം ഈ ത്രിമൂര്‍ത്തികള്‍ നടപ്പു തുടങ്ങി. കുറച്ചങ്ങോട്ട് നടന്നപ്പോള്‍ വഴിയരികില്‍ കുറച്ചുപേര്‍ മുന്നിലൊരു ബോര്‍ഡും വെച്ച്, ഒരു പേപ്പര്‍ കപ്പും നീട്ടിപ്പിടിച്ച് ഇരിക്കുന്നുണ്ടായിരുന്നു. ചുറ്റുമുള്ള മറ്റു കാഴ്ചകള്‍ കണ്ടുനടന്നിരുന്ന അറുമുഖം എന്തോ ഇവരെ നോക്കാന്‍ വിട്ടുപോയി.

“ഹൊ, ഇവിടെയും ഉണ്ടോ ഇരക്കുന്നവര്‍’ എന്ന ഞങ്ങളുടെ ചര്‍ച്ച കേട്ടപ്പോഴാണ്‍ ‘അറു’വിന്‍ സംഗതി കത്തിയത്. "ഒരു നിമിഷം ഞാനിപ്പം വരാം"ന്നും പറഞ്ഞ് അവന്‍ തിരിഞ്ഞു നടന്നു. ഞങ്ങളെ മൊത്തത്തില്‍ ഞെട്ടിച്ചുകൊണ്ട് അവന്‍ കീശയില്‍ നിന്ന് രണ്ടു ഡോളര്‍ എടുത്ത് കൂട്ടത്തില്‍ വെളുത്ത ഒരുത്തന്റെ പാട്ടയിലേക്കിട്ടിട്ട് അയാളോടെന്തോ പറഞ്ഞു. അതും കഴിഞ്ഞ് തിരിച്ച് ഞങ്ങളുടെ അടുത്തേക്ക് നടന്നു.

കൂടെ എത്തിയതും, ഷോക്കില്‍ നിന്ന് തീര്‍ത്തും അങ്ങോട്ട് മുക്തമാകാതിരുന്ന ഞങ്ങള്‍ രണ്ടുപേരും ഒരേ സ്വരത്തില്‍ അവനോട് ചോദിച്ചു, “നീയെന്തിനാടാ രണ്ടു ഡോളര്‍ വെറുതെ കൊടുത്തത്?“.
ഞങ്ങളെ നോക്കി അവന്‍ പുച്ഛത്തില്‍ ഒന്നു ചിരിച്ചു. എന്നിട്ട് പറഞ്ഞു “എടാ ഈ വെള്ളക്കാര്‍ കുറെ കാലം നമ്മളെ ഭരിച്ച് കട്ടു മുടിച്ചതല്ലേ. അവന്മാര്‍ക്ക് രു പിച്ചക്കാശ് കൊടുക്കുന്നതില്‍ ഒരഭിമാനമില്ലേടാ?“
“ആ അതു ശരിയാണല്ലോ’ എന്ന് പറയാന്‍ തൊള്ള വരെ വന്നെത്തുമ്പഴേക്കും, സന്ദീപ് പറഞ്ഞു,‘എടാ അറൂ, നീയൊരു മന്തനാണല്ലോടാ.. നമ്മളെ ഭരിച്ചത് ബ്രിട്ടീഷുകാരല്ലേ, അതിന്‍ ഈ അമേരിക്കക്കാരെന്തു പിഴച്ചു? നീ വെറുതെ നിന്റെ കാശ് കളഞ്ഞു!’
അറുവിന്‍ അതൊരു ഷോക്കായിപ്പോയി. ചരിത്രം ഇങ്ങനെ ഒരു കൊഞ്ഞനം കാണിക്കുമെന്ന് അവന്‍ തീരെ പ്രതീക്ഷിച്ചിരുന്നില്ല. പിന്നെയങ്ങോട്ട് നടന്നത് നൂറു ശതമാനം സത്യമായി വിവരിക്കാന്‍ പറ്റുമെന്ന് തോന്നുന്നില്ല. ചുരുക്കത്തില്‍ സംഭവങ്ങളുടെ ചുരുളഴിയുന്നതിങ്ങനെ.
ചിന്താഭാരത്താല്‍ കുനിഞ്ഞതും എന്നാല്‍ അതേസമയം നിശ്ചയദാര്‍ഢ്യത്താല്‍ ഉയര്‍ന്നതുമായ തന്റെ ശിരസ്സുയര്‍ത്തിപ്പിടിച്ച് അറുമുഖം മെല്ലെ ആ ഇരക്കുന്നവരുടെ ഇടയിലേക്ക് ചെല്ലുന്നു. താന്‍ കാശ് കൊടുത്തവനോട് അവനെന്തോ പറയുന്നു. കേള്‍ക്കുന്നവന്റെ നിഷേധാര്‍ത്ഥത്തിലുള്ള തലയാട്ടല്‍. പിന്നെ കാണുന്നത് അറു തന്റെ കൈ ഇരക്കുന്നവന്റെ പാത്രത്തിലേക്കിടുന്നതാണ്‍..പിന്നെ അവിടെ ഇരിക്കുന്ന അഞ്ചെട്ടാള്‍ക്കാര്‍ ഒന്നിച്ചെഴുന്നേല്‍ക്കുന്നു!

ബാക്കി പറയാന്‍ ഞാനാളല്ല..80 കിമി സ്പീഡില്‍ ഓടുമ്പോള്‍ തിരിഞ്ഞു നോക്കാന്‍ വല്യ പാടാ ഇഷ്ടാ! :)

അന്ന് ആ ഇരക്കുന്നവനോട് ആദ്യമായിട്ടും അവസാനമായിട്ടും അറുമുഖം എന്താ പറഞ്ഞത് എന്നത് മാത്രം ഇന്നും അവനു മാത്രമറിയാവുന്ന സീക്രട്ട്!

വിഷു ആശംസകള്‍

2007-04-14T23:06:00.000+08:00

എല്ലാവര്‍ക്കും സ്നേഹം നിറഞ്ഞ വിഷു ആശംസകള്‍.

കണ്ണന്റെ ഒന്നാം ക്ലാസ്സ്

2007-04-04T21:02:00.000+08:00

കണ്ണന്‍ ഇന്ന് ഒന്നാം ക്ലാസ്സിലേക്ക്.

നീളം തികച്ചുള്ള സ്ലേറ്റ് പെന്‍സിലും, പുതിയ സ്ലേറ്റും മാത്രം എടുത്ത് ആഘോഷത്തോടെ പോയിരുന്ന ആ ഒന്നാം ക്ലാസല്ല ഇന്ന്‍! ആറേഴു കട്ടിപ്പുസ്തകങ്ങളും, കുടിക്കാനുള്ള വെള്ളവും സ്നാക്സ് ബോക്സും ലഞ്ച് ബോക്സും എല്ലാം കൂടിയ ആ സ്കൂള്‍ ബാഗിന്‍ ഉദ്ദേശം ഒരു 8 കിലോ തൂക്കം കാണും! എടുത്തു പൊക്കാന്‍ നല്ല പാടാണെന്നേ

ഇതാ ഒരു ഭാവഗായകന്‍..

2007-03-10T11:20:00.000+08:00

കഴിഞ്ഞ വെക്കേഷന്‍ കാലത്ത് വിരുന്നു വന്ന ഈ യുവഗായകനെ ഒന്നു പരിചയപ്പെടൂ.
പാട്ട് പാടാനറിയാമോ എന്ന ചോദ്യത്തിന്നുത്തരം ‘ഇന്നാപിടിച്ചോ‘ന്നുള്ള ഈ ആക്ഷന്‍ ആയിരുന്നു.

ശങ്കരേട്ടന്‍‍ പിന്നേം തെങ്ങേല്‍ തന്നെ

2007-03-10T00:12:00.000+08:00

കഴിഞ്ഞ തവണ നാട്ടില്‍ പോയപ്പോള്‍ എടുത്തത്..Resolution കുറേ കുറയ്ക്കേണ്ടിവന്നു upload ചെയ്യാന്‍. ബാക്ഗ്രൌണ്ട് മ്യൂസിക്കും കൂടി ശ്രദ്ധിച്ചാല്‍ നാട്ടില്‍ പോയ ഒരു ഫീലിങ്ങ് വരുത്താം!!! :-)

March 5th, 2007: Protest against plaigarism by Yahoo! India

2007-03-03T18:40:00.000+08:00

Yahoo! India plagiarised contents from couple of malayalam blogs when Yahoo! launched their Malayalam portal. The giant corporation hasn't yet owned up to apologize to the bloggers. When accused, they silently removed the contents. We need an apology! When asked for apology, Yahoo! India is now accusing WebDunia as their content provider. The contents appeared on Yahoo! domain and not on Webdunia's Domain. Hence, we hold Yahoo responsible. I am protesting against this and joining hundreds of bloggers in this march against blatant corporate plagiarisation. Tommorow I can appoint a thirdparty content provider and he can steal all the content from all over the web, for me! May be even I can ask my content provider to steal from Yahoo! iteslf. Yahoo! cannot wash its hand that simply! We need an apology on this matter from Yahoo! !

യാഹൂ ഇന്ത്യയുടെ മലയാളം പോര്ട്ടലില്, മലയാളം ബ്ലോഗുകളില് നിന്ന് കുറിപ്പുകള് മോഷ്ടിച്ച് ഇട്ടിട്ടുണ്ട്. പരാതിപ്പെട്ടവരുടെ കുറിപ്പുകള് നീക്കം ചെയ്യുക എന്നല്ലാതെ, ഉത്തരവാദിത്തം ഏറ്റെടുത്ത്, ഒരു ഖേദപ്രകടനം നടത്താന്, ഇത്രയും നാളായിട്ട് അവര് തയ്യാറായിട്ടില്ല. തെറ്റ് നടന്നു എന്ന് വ്യക്തമായ സ്ഥിതിയ്ക്ക്, ബൂലോഗ കൂട്ടായ്മയോട് അവര് മാപ്പ് പറയേണ്ടത് ആവശ്യമാണ്. മാപ്പ് പറയാന് ആവശ്യപ്പെട്ടപ്പോള്, യാഹൂക്കാര്, അവര്ക്ക് കുറിപ്പുകളൊക്കെ സംഭാവന നല്കിയത് വെബ് ദുനിയ എന്ന കമ്പനിയാണെന്ന് പറഞ്ഞ്, ഉത്തരവാദിത്തത്തില് നിന്ന് ഒഴിയാന് ശ്രമിക്കുകയാണ്. മോഷ്ടിക്കപ്പെട്ട കുറിപ്പുകള് വന്നിരിക്കുന്നത്, യാഹൂവിന്റെ വെബ് സൈറ്റില് ആണ്. വെബ് ദുനിയയുടെ സൈറ്റില് അല്ല. അതുകൊണ്ട് യാഹൂ മാത്രമാണ്, അതിന്റെ ഉത്തരവാദികള് എന്ന് ബൂലോഗം ഉറച്ച് വിശ്വസിക്കുന്നു. യാഹൂ എന്ന വന്കിട കുത്തക സാമ്രാജ്യത്തിന്റെ ചോരണമാരണത്തിന് എതിരായി, ബൂലോഗകൂട്ടായ്മയിലെ ഒരു അംഗം എന്ന നിലയ്ക്ക്, ഈ പ്രതിഷേധത്തില് ഞാനും പങ്കുചേരുന്നു. യാഹൂ മാപ്പ് പറയുക.

More liniks
1. മാതൃഭൂമി വാര്‍ത്ത
2. Indian bloggers Mad at Yahoo
3. Indian Bloggers Enraged at Yahoo! India’s Plagiarism
4. Indian bloggers Mad at Yahoo
5. Malayalam Bloggers Don't Agree with Yahoo India
6. Yahoo back upsetting people
7. കറിവേപ്പില
8. copyright violations

ചില മോന്തിച്ചിത്രങ്ങള്‍

2007-01-06T21:29:00.000+08:00

സ്ഥലം : - ഇടയിലേക്കാട് , തൃക്കരിപ്പൂര്‍, പയ്യന്നൂര്‍. (പയ്യന്നൂരില്‍ നിന്ന് 10km അകലെ). കടലിനും പുഴക്കും ഇടയിലായി കിടക്കുന്ന ഒരു ചെറിയ ദ്വീപ്. ഒരിക്കല്‍ അവിടെ എത്തിയാല്‍ തിരിച്ചു പോകാന്‍ തോന്നില്ല!

സ്ഥലം : - ഇതല്ലേ നമ്മുടെ ശംഖുമുഖം! തിര്വോന്തരത്ത് പോകാന്‍ ഭാഗ്യമുണ്ടായി ഇത്തവണ. അവിടെ നിന്നെടുത്തത്!

സ്ഥലം : - ഇത് പറഞ്ഞാല്‍ അറിയാന്‍ അല്പം ബുദ്ധിമുട്ടുള്ള സ്ഥലമാണേ. പയ്യന്നൂരില്‍ നിന്ന് ഏകദേശം 35km കിഴക്കോട്ട് പോയാല്‍ എത്തുന്ന കക്കറ എന്ന സ്ഥലം.. അവിടെ ഒരു കുന്നിന്റെ മോളില്‍ നിന്നെടുത്തത്!

അഗ്രജന്റെ പടങ്ങളോട് കടപ്പാട്!

വെബ്സൈറ്റിലേക്കുള്ള വഴി!

2006-12-20T17:35:00.000+08:00

ഇത്തവണത്തെ ഭാഷാപോഷിണിയില്‍ വായിച്ച ഒരു തമാശ, ചിരിക്കാനറിയാവുന്നവര്‍ക്കായി ഇവിടെ പോസ്റ്റുന്നു.

തിരുവനന്തപുരം ജില്ലയിലെ ഒരു സ്ഥലത്തുനിന്നും പത്രമോഫീസില്‍ കിട്ടിയ ഒരു കത്ത്:-
“സര്‍ക്കാര്‍ വെബ്സൈറ്റില്‍ പുതിയ ശമ്പള പരിഷ്കരണ ഉത്തരവു ലഭിക്കുമെന്ന് മാതൃഭൂമി, മലയാളമനോരമ എന്നീ ദിനപത്രങ്ങളിലെ തലസ്ഥാന വാര്‍ത്താ ശീര്‍ഷകത്തില്‍ വാര്‍ത്ത വന്നിരുന്നു. എന്നാല്‍ സര്‍ക്കാര്‍ വെബ്സൈറ്റ് എവിടെയാണെന്ന് തിരുവനന്തപുരം നഗരവാസികള്‍ക്ക് പോലും അറിയില്ല. ദയവായി, സര്‍ക്കാര്‍ വെബ്സൈറ്റ് തിരുവനന്തപുരത്ത് ഏതു സ്ഥലത്താണ് സ്ഥിതി ചെയ്യുന്നതെന്നുകൂടി വ്യക്തമാക്കിയാല്‍ സര്‍ക്കാര്‍ ജീവനക്കാര്‍ക്കും മറ്റും ആശ്വാസമായേനെ”

തൊഴിലില്ലായ്മ..

2006-12-12T23:02:00.000+08:00

വല്യമ്പ്രാന്‍ അങ്ങ് അമേരിക്കയില്‍ നിന്നേ ഓടിച്ചാടി വന്നിരിക്കുന്നു. കമ്പനിയിലെ ചിലവ് കുറച്ചില്ലെങ്കില്‍ എന്റെ വീതവും വാങ്ങി ഞാനങ്ങ് പോകുമേ എന്ന് അറബിരാജകുമാരന്‍ ഭീഷണി മുഴക്കിയതുകൊണ്ടാണോ എന്തോ, വന്ന ഉടനെ അടുത്തകൊല്ലത്തെ ബഡ്ജറ്റ് 20% കൂടി കുറക്കാന്‍ പറഞ്ഞ് വല്യമ്പ്രാന്‍ ഒന്ന് നീട്ടിത്തുപ്പി!
ലാപ്ലാസ് ട്രാന്‍സ്ഫോം മുതല്‍ ആറ്റുകാല്‍ രാധാകൃഷ്ണന്റെ വരെ സാങ്കേതിക വിദ്യ ഉപയോഗിച്ച് രാവുപകലിരുന്നുണ്ടാക്കിയ നമ്പരുകളാണ് ഒറ്റയടിക്ക് അങ്ങോരു വെട്ടിനിരത്തിയത്. ഇനിയത് ആദ്യേ പൂത്യേ ചെമ്പൂത്യേ തുടങ്ങണം. സകലദൈവങ്ങളെയും വിളിച്ച് ആദ്യേ തുടങ്ങി. തീര്‍ന്നപ്പോള്‍ നട്ടപ്പാതിര. പിറ്റേന്ന് കണ്ടപ്പോള്‍, ഇതേ അവസ്ഥയിലുള്ള ഗോസായി പറഞ്ഞു-“വെറുതെയല്ല ലോകത്ത് ഇത്രയധികം തൊഴിലില്ലായ്മ. അഞ്ചാള്‍ക്കാര്‍ എടുക്കേണ്ട പണിയല്ലേ ഒരുത്തനെക്കൊണ്ട് എടുപ്പിക്കുന്നത്!“

ഓഫീസ് സമയത്തെ ബ്ലോഗിങ്ങ്!

2006-07-30T22:58:00.000+08:00

സ്വന്തം ബ്ലോഗിന്റെ അടുപ്പില്‍ ചേര പായാന്‍ തുടങ്ങിയിട്ട് കാലം കുറച്ചായി..ഈയിടെയായിട്ട് ഓഫീസില്‍ തിരക്കോട് തിരക്ക്. വീട്ടിലെത്തുന്നത് തന്നെ പാതിരാത്രിക്കാണ്. പക്ഷേ ഓരോ ദിവസവും 10-20 പുതിയ മലയാളം ബ്ലോഗുകളാണിങ്ങനെ ഇറങ്ങി വരുന്നത്! ഇവര്‍ക്കൊക്കെ ഈ ബ്ലോഗ് ചെയ്യാന്‍ എവിടുന്നാ ഇത്രയും സമയംന്ന് ചിന്തിച്ചിട്ട് ഒരു എത്തും പിടിയും കിട്ടിയില്ല! പിന്നെ നോക്കിയപ്പോളല്ലേ, മിക്കവരും ഈ പരിപാടി ഓഫീസ് സമയത്താണെന്ന് മനസ്സിലായത്!

കുറുമാന്റെ അയ്യര്‍ ദ ചീപ് കൂടി വായിച്ചപ്പോള്‍ ’ഹൊ.. ഇവരൊക്കെ കൊള്ളാലോ,job satisfaction എന്താണെന്നു ഇവരോട് ചോദിക്കൂ’ എന്നു പറയാന്‍ തോന്നി!
എന്നാപ്പിന്നെ ഞാനായിട്ട് എന്തിനാ കുറക്കുന്നത്! ഐശ്വര്യമായിട്ട് അടുത്താഴ്ച പരിപാടി തുടങ്ങാംന്നും കരുതി ഇരുന്നപ്പോ ദേ വരുന്നു ഒരു വാര്‍ത്ത! ഓഫീസിനെ പറ്റി ബ്ലോഗ് ചെയ്തതിനെ ഒരു പെണ്ണുമ്പിള്ളയെ ജോലിയില്‍ നിന്ന് പിരിച്ചുവിട്ടൂന്ന്.!

ഇത് വായിച്ചതോടെ ഞാന്‍ വീണ്ടും നല്ല ആട്ടിന്‍‌കുട്ടിയായി!!

എന്നോ മറന്ന് പോയ കാഴ്ച - 2

2006-06-25T12:06:00.000+08:00

അപ്പോം ചുട്ട് അടയും ചുട്ട്.....ദാ ഇപ്പം പൊട്ട്വോ..

ദാ വീണു..പൊട്ടി..ഇനിയിപ്പം അതിന്റെ മുകളില്‍ ആവാം കളി!

എന്നോ മറന്ന് പോയ കാഴ്ച - 1

2006-06-24T15:54:00.000+08:00

എന്നോ മറന്നു പോയ ഒരു കാഴ്ച. ഇപ്പോ പാടം നിറയെ തെങ്ങുകള്‍ മാത്രം.. ആരെയും കുറ്റം പറയാന്‍ പറ്റില്ല.. നഷ്ടം വരുമെന്നുറപ്പുള്ളപ്പോള്‍ വീണ്ടും വീണ്ടും നെല്ലിറക്കാന്‍ പറയാന്‍ നമ്മള്‍ക്കെന്തവകാശം?

സിമ്പിള്‍ പെന്‍ഡുലം..

2006-06-11T16:02:00.000+08:00

പ്രീ ഡിഗ്രി ഒന്നാം വര്‍ഷം..സ്കൂളിലെ മസിലു പിടുത്തത്തില്‍ നിന്ന് രക്ഷപ്പെട്ടെത്തിയതിന്റെ സന്തോഷം എല്ലാ കുട്ടിസായിപ്പന്മാര്‍ക്കും ഉണ്ട്. നമ്മളെ പോലെ സാദാ സ്കൂളില്‍ നിന്ന് വരുന്നവനു, സ്ഥിതി എപ്പൊഴും ഇതുപോലെയൊക്കെത്തന്നെ ആയതു കൊണ്ടു ‘കൊളമെത്ര കൊക്ക് കണ്ടു’ എന്ന ഭാവം.
ടൈംടേബിളില്‍ ഇല്ലെങ്കിലും, ക്ലാസ് കട്ട് എന്ന ഒരു ഐറ്റം കൂടി ഇവിടെ ഉണ്ട് എന്നത് സാബു ചെറിയാനെ ചില്ലറയൊന്നുമല്ല സന്തോഷിപ്പിച്ചത്. ഈ പരിപാടി സെന്റ് മൈക്കിള്‍സ് സ്കൂളില്‍ ഇല്ലാത്തതിന് അവന്‍ ഗബ്രിയേലച്ചനെ ഒന്നു മനസ്സിരുത്തി പ്രാകി. ഈ വര്‍ഷം കൂടുതല്‍ ഫോക്കസ് ചെയ്യേണ്ടത് ഈ പുതിയ ഐറ്റത്തിനാണെന്ന് അവന്‍ സ്വയം ഒരു തീരുമാനവുമെടുത്തു..
പക്ഷെ ആദ്യത്തെ ലാബ് സെഷന്‍ അവന്‍ മുടക്കിയില്ല..അന്നാണല്ലോ ഈ ലാബെന്താണെന്ന് വല്ലവനും ഒന്നു വിശദീകരിക്കുന്നത്. അങ്ങനെ സാബു ഫിസിക്സ് ലാബിലെത്തി. ആദ്യത്തെ എക്സ്പിരിമെന്റ് - സിമ്പിള്‍ പെന്‍ഡുലം. വെരി സിമ്പിള്‍ പരിപാടി. ഒരു ചെറിയ ബോള്‍ എടുക്കുക.. അതെടുത്ത് ഒരു നൂലിന്റെ അറ്റത്ത് കെട്ടുക. അങ്ങോട്ടും ഇങ്ങോട്ടും ആട്ടുക. പിന്നെ കൈയില്‍ തരുന്ന സ്റ്റോപ് വാച്ചില്‍ സമയം എത്രയായി എന്നു നോക്കുക. കൂടെയുള്ളവന്‍ എഴുതി വെച്ചത് പകര്‍ത്തെഴുതുകുകയും കൂടി ചെയ്താല്‍ തീര്‍ന്നു.
ഇമ്മാതിരി ബോറന്‍ പരിപാടികള്‍ക്ക് ഇനി സമയം കളയണ്ട എന്ന് തീരുമാനിക്കാന്‍ കൂടുതല്‍ നേരം വേണ്ടിവന്നില്ല.
പിന്നെ ആ ലാബിന്റെ പടി ചവിട്ടുന്നത് യൂനിവേര്‍സിറ്റി പ്രാക്റ്റിക്കല്‍ പരീക്ഷയുടെ അന്നാണ്. രാജേഷിന്റെ റെക്കോഡ് ബുക്ക് അതേ പോലെ കോപ്പി ചെയ്ത് വെച്ചു എന്നതാണ് പ്രിപ്പറേഷന്‍ എന്ന ഏക റ്റൈം വേസ്റ്റ്..“വരുന്നത് വരുന്നിടത്ത് വെച്ച് കാണാം, അല്ല പിന്നെ’ എന്നു മനസ്സില്‍ പറഞ്ഞുകൊണ്ട് സാബു പോയി, എക്സാമിനറുടെ മേശപ്പുറത്ത് വെച്ചിരുന്ന ലിസ്റ്റില്‍ നിന്ന് അവന്റെ നറുക്കെടുത്തു. വായിച്ചു -‘ട്യൂണിങ്ങ് ഫോര്‍ക്ക്’..
.....
എല്ലാവരും അവരവരുടെ എക്സ്പിരിമെന്റില്‍ മുഴുകിയിരിക്കുമ്പോഴാണ് ആ കാതടപ്പിക്കുന്ന പൊട്ടിച്ചിരി...എത്തി നോക്കിയപ്പോള്‍, ചിരിയുടെ ഉത്ഭവസ്ഥാനം, സാബുവിന്റെ റ്റേബിളിന്റെ അടുത്ത് നിന്നാണ്, ഉടമ എക്സ്റ്റേര്‍ണല്‍ എക്സാമിനറും. അടക്കാന്‍ മറന്ന് പോയ വായയുമായി സാബു സാറിനെയും നോക്കിക്കൊണ്ടു നില്‍ക്കുന്നു.
നൂലിന്റെ അറ്റത്ത് കെട്ടിവിട്ട ആ ട്യൂണിങ്ങ് ഫോര്‍ക്ക് അപ്പോഴും ആടിക്കൊണ്ടിരിക്കുന്നുണ്ടായിരുന്നു.

S.S.L.C

2006-06-11T15:20:00.000+08:00

ഒരിക്കലും മറക്കാത്ത എസ്സെസ്സെല്സീ ഉത്തരങ്ങള്‍...വഴിയില്‍ കിടന്നു കിട്ടിയത് ഇവിടെ ഇടുന്നു..കേട്ടിട്ടില്ലാത്തവര്‍ക്കു വേണ്ടി..

1. കടല്‍ പാമ്പിനെ എങ്ങനെ തിരിച്ചറിയാം?
നക്കി നോക്കിയാല്‍ അറിയാം
2. അമീബ ഇര പിടിക്കുന്നതെങ്ങനെ?
രാത്രി കൂറ്റാക്കൂറ്റിരുട്ട്. അങ്ങ് അകലെ ഏതോ ഒരു പട്ടി ഓളം ഇടുന്ന ശബ്ദം. അമീബ കാട്ടിലൂടെ പതുങ്ങി പതുങ്ങി നടന്നു..അതാ ഒരു മാന്‍.ഒറ്റ ചാട്ടത്തിനെ അതിന്റെ കഴുത്തില്‍ പിടി മുറുക്കുന്നു. നാലു വട്ടം അതിനെ കുടഞ്ഞു.പിന്നെ കടിച്ചു തിന്നു. ഇങ്ങനെയാണു അമീബ ഇര പിടിക്കുന്നത്.
3. സള്‍ഫ്യൂറിക് ആസിഡ് ഉണ്ടാക്കുന്നതെങ്ങനെ?
ആദ്യം ഒരു ബീക്കറില്‍ കുറച്ചു വെള്ളം എടുക്കുക. സള്‍ഫ്യൂറസ് ഓക്സൈഡ് ( ഇതിനിടയില്‍, ആരുടെ പേപ്പറില്‍ നിന്നാണൊ കോപ്പി അടിച്ചത്, ആ വിദ്വാന്‍ പേപ്പര്‍ മറിച്ചുകാണും..എന്തായാലും, പിന്നെ ഉത്തരം പോയത് ഇങ്ങനെ..)
എന്തിനധികം പറയുന്നു..അങ്ങനെ സള്‍ഫ്യൂറിക് ആസിഡ് ഉണ്ടായി..
4. വേലികയറ്റവും വേലിയിറക്കവും വിശദീകരിക്കുക
വര്‍ദ്ധിച്ച് വരുന്ന നമ്മുടെ ജനസംഖ്യ ഒരു വലിയ പ്രശ്നമാണ്. ഇതുകാരണം സ്ഥലം കുറഞ്ഞ് വരുന്നു. വീടുകള്‍ കൂടുന്നു, അങ്ങനെ അതിര്‍ത്തി തര്‍ക്കങ്ങള്‍ ഉണ്ടാവുന്നു. അങ്ങനെ തര്‍ക്കങ്ങള്‍ മൂക്കുമ്പോള്‍ രാത്രി അയല്‌വാസികള്‍ നമ്മുടെ പുരയിടത്തില്‍ കൂടി വേലി കയറ്റി കെട്ടും. ഇതിനെ വേലി കയറ്റം എന്നു പറയുന്നു..
നമ്മള്‍ രാവിലെ അതു പൊളിച്ചു കത്തിക്കും. അതിനെ വേലി ഇറക്കം എന്നു പറയുന്നു!

യൂണിയന്‍ നേതാവ്

2006-06-03T18:10:00.000+08:00

മംഗലാപുരത്ത് MRPL (mangalore refineries and Petro chemicals) ന്റെ പണി നടക്കുന്ന കാലം. പണി കോണ്ടറാക്റ്റ് എടുത്തതു മുഴുവന്‍ ഗോസായി കംബനികളാണെങ്കിലും പണിക്കാര്‍ ഒട്ടുമുക്കാലും മലയാളികള്‍. ഇതിനെതിരെ അവിടെയും ഇവിടെയും ആയി ചില അപസ്വരങ്ങള്‍ കേള്‍ക്കാന്‍ തുടങ്ങിയിട്ട് കുറച്ച് നാളായി..
അങ്ങനെയിരിക്കെ ഒരു ദിവസം വൈകുന്നേരം എം ആര്‍ പി എല്ലിന്ടെ ഗേറ്റിനു മുന്‍പില്‍ ഒരു വൈകുന്നേരം ഒരു വന്‍ ആള്‍ക്കൂട്ടം. പെട്ടെന്നു തട്ടിക്കൂട്ടിയ ഒരു സ്റ്റേജില്‍ ഒരു യൂനിയന്‍ നേതാവു പ്രസംഗിക്കുകയാണ്- കന്നടയില്‍ അയാള്‍ കടിച്ചു കീറുന്നുണ്ട്, വന്‍ മണ്ണിണ്ടെ മക്കള്‍ വാദം. ഈ നാട്ടുകാര്‍ക്ക് പണി കൊടുക്കുന്നില്ലെങ്കില്‍ ഇങ്ങനെയൊരു പരിപാടി ഇവിടെ വേണ്ട, മലയാളികളെ തുരത്തുക, അല്ലെങ്കില്‍ MRPL പൂട്ടുക എന്ന ലൈന്‍!
പെട്ടെന്നു, ചെറുതായി മഴ ചാറാന്‍ തുടങ്ങി.. പ്രസംഗം കേട്ട് നിന്നവരൊക്കെ പല വഴിക്കും പോയി മഴ കൊള്ളാതെ കാത്തു..കുറച്ച് നേരം കൂടി നേതാവു പ്രസംഗം തുടര്‍ന്നു..മഴ വന്നതിനും, തന്റെ കേള്‍വിക്കാര്‍ പോയതിലും നേതാവിനു ദേഷ്യം വന്നത് സ്വാഭാവികം..
തൊട്ടടുത്ത് നിന്ന അനുയായിയോട് നേതാവിന്റെ ആജ്ഞ “എനിക്കൊരു കുട തരാന്‍ നിന്നോട് പ്രത്യേകം പറയണോ”..
മൈക്ക് ഓഫു ചെയ്യാന്‍ നേതാവു മറന്നു പോയിരുന്നു...
മലയാളിയുടെ കൈയിലിരുപ്പേ.....

ഒരു യൂറോപ്യന്‍് പടം പിടിത്തം

2006-06-02T04:04:00.000+08:00

ലോകത്തിലെ മൂന്നാ‍മത്തെ ഏറ്റവും വലിയ പള്ളിയാണത്രേ..പക്ഷെ പറഞ്ഞിട്ടെന്താ കാര്യം..നമ്മളെത്തുംബോളെക്കു ആവിടെ മിനുക്കല്‍ മരാമത്തുപണി നടന്ന് കൊണ്ടിരിക്കുന്നു...അതുകൊണ്ട് ക്യാമറ വെച്ചു പടം പിടിക്കാന്‍ പറ്റില്ലാത്രെ..അങ്ങനെ ഫോണിലെ ക്യാമറയില്‍ എടുത്തതാണിത്...
ഈ മരാമത്ത് പണി കഴിഞ്ഞാല്‍ ഈ പള്ളി ലോകത്തിലെ രണ്ടാമത്തെ ആവുമായിരിക്കും
ഇറ്റലിയിലെ മിലാനില്‍ നിന്ന്..

കുറെ തോടുകള്‍ക്കു മുകളില്‍ ഒരു നഗരം..ഇവിടെ കൊതുകൊന്നും ഇല്ലേന്തോ...

ബൈ ദ ബൈ, ഇവിടെ നിന്ന് നോക്കിയാല്‍ ഒന്നിനു പുറകെ ഒന്നായി 7 പാലങ്ങള്‍ കാണാമത്രെ..അടിപൊളി ക്യാമറയായതുകൊണ്ടു ഇവിടെ ഇത്രയൊക്കെയേ കാണിക്കാന്‍ പറ്റൂ..

ഹോളണ്ടിലെ (അതോ നെതറ്ലണ്ടോ..എന്തേലും ആട്ടെ) ആംസ്റ്റര്‍ഡാമില്‍ നിന്ന്..

പണ്ട് സാമൂഹ്യ പാഠം പുസ്തകത്തില്‍ കണ്ട കുറെ കെട്ടിടങ്ങള്‍..ഇവിടെയൊക്കെ റോട്ടില്‍ ഒരു മനുഷ്യ ജീവിയെ കണ്ടു കിട്ടാനാണു പാട്..

ബ്രസ്സല്സിലെ ഒരു പടം..

ഇതാണു മാഷെ മാസ്റ്റര്‍പീസ്..ലോകത്ഭുതങ്ങളില്‍ ഒന്നാണെന്നാ‍ണ് കേട്ടത്..ഇതിനെ ആ ലിസ്റ്റില്‍ പെടുത്തിയവനു വിവരമില്ലാഞ്ഞിട്ടാണോ അതോ ഈ കാണുന്ന നമുക്ക് വിവരം കൂടിയത് കൊണ്ടാണോ...കണ്ടിത്തത്ര ബോധിച്ചില്ല..

പിന്നെ കൊടും തണുപ്പത്ത് ഇതിന്റെ മുകളില്‍ കയറുകയും കൂടെ ആയപ്പോള്‍ കമ്പ്ലീറ്റായി..

പാരീസില്‍ നിന്ന്..

വേഗം കരച്ചില്‍ നിറ്ത്തിക്കോ, ഇല്ലെങ്കില്‍ പോലീസു വരും..

2006-06-01T21:49:00.000+08:00

മംഗലാപുരത്തു നിന്നും കണ്ണൂരിലേക്കുള്ള പാസഞ്ചറിന്റെ ഗാന്ധി ക്ലാസ്..ഇങ്ങനെ കരഞ്ഞു നിലവിളിക്കാന്‍ ആരോ കാശു കൊടുത്തതുപോലെ കാറുന്ന ഒരു കുഞ്ഞ്. കുഞ്ഞിന്റെ രണ്ടു സൈഡിലായി അച്ചനും അമ്മയും. അവറ്ക്കു മുഖമായി ഒരു അതിഗൌരവക്കാരനായ ഒരു മീശക്കാരനും കൂടെ ഞാ‍ന്‍ ഈ നാട്ടുകാരന‍ല്ലേ എന്ന ഭാവത്തിലിരിക്കുന്ന ഒരു കോളേജ് കുമാരനും..
കുഞ്ഞിന്റെ കരച്ചില്‍ നിറ്ത്താന്‍, പറഞ്ഞുകേട്ടതും അനുഭവിച്ചറിഞ്ഞതുമായ എല്ലാ വഴികളും ആ അമ്മ നോക്കുന്നുണ്ട്..പക്ഷെ പറഞ്ഞിട്ടെന്താ കാര്യം, നോ ഗുണം!!
അപ്പോളാണു അമ്മക്കു ആ ഭൂതോദയം ഉണ്ടായതു..തൊട്ടു മുന്‍പില്‍ ഇരിക്കുന്ന മീശക്കാരനെ ചൂണ്ടിക്കാട്ടി കുഞ്ഞിനോട് പറഞ്ഞു.‘ദാ, ആ ഇരിക്കുന്ന ആളെക്കണ്ടാ...പോലീസാ..നീ കരച്ചില്‍ നിറ്ത്തിയില്ലെങ്കില്‍ ആ പോലീസ് നിന്നെ പിടിച്ചു കൊണ്ടോവും’

(പട്ടണപ്രവേശത്തില്‍ കെ പി ഏ സി ലളിത പറഞ്ഞപോലെ) ഇന്നേവരെ ജീവനോടെ ഒരു പോലീസുകാരനെ നേരിട്ടു കണ്ടിട്ടില്ലാത്ത കുഞ്ഞു കുറച്ച് നേരം ആ മീശക്കാരനെ ഒന്നു നോക്കി. അമ്മ പറഞ്ഞതേറ്റു..കുഞ്ഞ് കരച്ചില്‍ നിര്‍ത്തി..
[** ഇതിലെന്താ ഇത്ര വിശേഷംന്നല്ലേ.. തോക്കില്‍ കയറി വെടി വെക്കാതെ വായനക്കാരാ...വായിച്ചു വലുതാവൂന്ന് പണ്ട് യുറീക്കയില്‍ വായിച്ചിട്ടില്ലേ...തുടര്‍ന്നു വായിക്കൂ..]

കരച്ചില്‍ നിറ്ത്തിയ കുഞ്ഞ് അമ്മയുടെ സാരിത്തുംബിന്റെ ഇടയിലൂടെ ഈ പോലീസുകാരനെ സസൂക്ഷ്മം നിരീക്ഷിക്കാന്‍ തുടങ്ങി..ഇത്രയും നേരം ചിരിക്കണോ അതോ കരയണൊ എന്നൊന്നും വല്യ പിടിപാടില്ലാതെ നില്‍ക്കുകായിരുന്ന മീശക്കാരനു തോന്നി- ഇവര്‍ ഇത്രയും എന്നെ പറ്റിപറഞ്ഞിട്ട് ഞാന്‍ മൈന്‍ഡ് ചെയ്യാതിരിക്കുന്നതു മോശമല്ലേ..ഞാന്‍ യഥാര്ത്ഥ പോലീസുകാരനാണെന്നു ഒന്നു തോന്നിപ്പിച്ചുകളയാം..
അങ്ങനെ വെറുതെ ഇരുന്ന പോലീസുമാമന്‍ കുഞ്ഞിനെ നോക്കി വെറുതെ ഒന്നു മീശ പിരിച്ചു..പോരേ പൂരം.. ഒരു ബ്രേക്കു കിട്ടിയതിന്റെ ഊക്കും കൂടി ചേറ്ത്ത് കുഞ്ഞു തുടങ്ങി..പൂറ്വാധികം ശക്തിയായിട്ട് തന്നെ..
ചെറുവത്തൂറ് മുതല്‍ തുടങ്ങിയ ആ കരച്ചില്‍ ഒന്നു നിറ്ത്തിക്കിട്ടിയതിന്റെ സന്തോഷത്തില്‍ ഇരിക്കുകയായിരുന്ന ആ അമ്മ ആ അഭിനവ പോലീസുകാരന്റെ നേരെ ഒരു ചാടിക്കടി--‘നിങ്ങള്‍ക്കൊന്നടങ്ങിയിരുന്നൂടെ മനുഷ്യാ..ഒരു മീശക്കാരന്‍ വന്നിരിക്കുന്നു’..

കവിതാ തിയേറ്ററും ഒരടിയും..

2006-06-01T21:44:00.000+08:00

സുകുവേട്ടന് ആളൊരു പാവമാണ്. ഏക ദൌര്‍ബല്യം സിനിമ മാത്രം ആയിരുന്നു. വിജയാ ടാക്കീസിലെ പൊള്ളുന്ന ആസ്ബ്‌സ്റ്റോസ് ഷീറ്റിനു കീഴെ മരത്തൂണുകള്‍കിടയിലൂടെ മാത്രം സിനിമ കണ്ടിരുന്ന സുകുവേട്ടനെ വിഷമിപ്പിച്ചതു, കണ്ണൂരില്‍ ജേബീസില്‍ പഠിക്കുന്ന ദിനേശന്റെ വാക്കുകളായിരുന്നു.
”എന്റെ സുകുവേട്ടാ..സിനിമ കാണുന്നുണ്ടെങ്കില്‍ അതു കവിതേന്നു കാണണം. എന്താ ഒരു സുഖം..പറഞ്ഞറിയിക്കാന്‍ പറ്റില്ല. അതും റിലീസ് പടല്ലേ വര്‍ന്നത്..”

ഈ സുഖത്തിന്റെ വിശദാംശങ്ങള്‍ അറിയാനാണു ദാമോദരന്മാഷുടെ പറംബിലെ ഉച്ച പണി പോലും കളഞ്ഞിട്ട് നേരെ ഇറങ്ങിയത്.കവിതാ തിയേറ്ററ് കണ്ടുപിടിക്കാന്‍ വല്യ ബുദ്ധിമുട്ടുണ്ടായില്ലെങ്കിലും ആദ്യമായി വരുന്നവന്റെ അങ്കലാപ്പ് മറച്ചുവെക്കാന്‍ കുറച്ചു കഷ്ടപ്പെട്ടു.
എവിടെയാണോ ഈ ടിക്കെറ്റ് കൊടുക്കുന്ന കിളിവാതില്‍..ആരോടെങ്കിലും ചോദിക്കാന്നു വെച്ചാല്‍, അതിനു സിനിമ കാണാന്‍ വന്നവര്‍ മുഴ്വന്‍ ഐ ഏ എസ് കിട്ടിയവരാണോ എന്തോ..ഇവന്മാരുടെ നില്പും ഭാവവും കണ്ടാല്‍ അങ്ങനെയേ തോന്നൂ..

ഇനി ടിക്കെറ്റ് എടുത്തിട്ട് വേറെ കാര്യം..ദേ നില്‍ക്കുന്നു ക്യൂ..സുകുവേട്ടനും നിന്നു പുറകില്‍.. എന്തൊരു അച്ചടക്കം..വിജയാ ടാക്കീസിലെ പോലെ ഉന്തില്ല, തള്ളില്ല.. കവിതാക്കാരോടും കണ്ണൂരുക്കാരോടും സുകുവേട്ടനു ഒരു ബഹുമാനം തോന്നി.
അല്ലാ, ഇതു നീങ്ങുന്ന ലക്ഷണമൊന്നും കാണുന്നില്ലല്ലോ..ഒരു രണ്ടു മിനിറ്റുകൂടി നോക്കാം.
ഇതാ നീങ്ങാന്‍ തുടങ്ങി, എല്ലാവരും വേഗം വേഗം നടക്കുന്നുണ്ടല്ലോ..
ദിനേശന്‍ പറഞ്ഞതു വെറുതെയല്ല..അല്ലാ, ഇവരെന്താ പോയി വാനില്‍ കയറുന്നത്..ഇനിയിപ്പം ഈ തിയേറ്ററില്‍ ടിക്കെറ്റ് തീറ്ന്നതു കൊണ്ടാവും, കവിതാക്കാര്‍ക്ക് വേറെയും ടാക്കീസ് ഉണ്ടെന്നല്ലെ ദിനേശന്‍ പറഞ്ഞത്..അഞ്ചു മിനിട്ടു കൊണ്ടു വാന്‍ എത്തേണ്ടിടത്ത് എത്തി..
‘പോലീസ് സ്റ്റേഷന്‍’‘ എന്ന ബോര്‍ഡ് വായിച്ചപ്പോഴേക്കും ഉള്ളൊന്നു കാളി..ഇവിടെ വരാന്‍ മാത്രം എന്താ ഈ പരിപാടി എന്നാലോചിക്കാന്‍ അധികം സമയം കിട്ടിയില്ല..സ്റ്റേഷനിലുള്ളില്‍ ഏമാന്‍ ഓരോരുത്തനോടും എന്തോ ചോദിക്കുന്നുണ്ട്.‘എന്താടാ നിന്റെ പേര്‍?’അതിബഹുമാനത്തോടെയുള്ള ആ ചോദ്യം തന്നോടാണെന്നു തിരിച്ചറിയാന്‍ കുറച്ചു സമയം വേണ്ടിവന്നു..
‘സു..സുകു’
‘ഇനി ടാക്കീസില്‍ സിഗററ്റ് വലിക്കുമോടാ?’ ചെറുപ്പത്തില്‍ അംബലത്തില്‍ നിന്ന് കത്തുന്ന ചന്ദനത്തിരി വായില്‍ വെച്ചു പുക വിട്ടതാണു, സുകുവേട്ടനും പുകയും തമ്മിലുള്ള ഏക ബന്ധം..
‘ഞാന്‍ വലിക്കാറില്ല സാറേ..’
’നുണ പറയുന്നോടാ..ആ. പൊയ്ക്കോ വേഗം..’ എന്ന ആജ്ഞയും ചെവിക്കുറ്റിക്കുള്ള അടിയും എല്ലാം ഒന്നിച്ചു കഴിഞ്ഞു..4 മണിക്കുള്ള സീമ പിടിച്ച് സുകുവേട്ടന്‍ നേരെ വീട്ടിലെത്തി..!
---പാവം സുകുവേട്ടന്‍ ..ടിക്കറ്റെടുക്കാനാണെന്നും വിചാരിച്ചു കയ്യറി നിന്നത് കഴിഞ്ഞ ഷോവിനു തിയേറ്ററില്‍ പുകവലിച്ചതിനു പോലീസു പിടിച്ചു വരി വരി ആയി നിറ്ത്തിയവരുടെ പുറകിലായിരുന്നു..

പീസ്: ഇടത്തെ ചെവിയില്‍ എപ്പോഴും, ബലൂണില്‍ കടുകിട്ട് കിലുക്കുന്ന ശബ്ദം കേള്‍ക്കുന്നത് കാരണം സുകുവേട്ടന്‍ പിന്നെ സിനിമയോടുള്ള ഇന്റ്രസ്റ്റ് തീരെ അങ്ങു പോയി...!!

2006-05-30T03:56:00.000+08:00

അങ്ങനെ ഞാനും ഒരു ബ്ലോഗനായി..

വെറുതെ ഇരിക്കുംബോള്‍ ഒരു പരിപാടി ആയല്ലോ എന്നും കരുതി തുടങ്ങിയതാ.. പിന്നെയാ ഇതിന്റെ തൊന്തരവു മനസ്സിലായതു...എന്താ ഇതിലെഴുതുക..
‘മലയാളം റ്റൈപ്പു ചെയ്യുന്ന പരിപാടി അറിഞ്ഞാല്‍ ബ്ലോഗു ചെയ്യാമെടെ’ എന്നു പറഞ്ഞവനെ കിട്ടിയിരുന്നെങ്കില്‍...
ഈ ഇന്റെര്‍നെറ്റ് ഇത്ര പുരോഗമിച്ചു എന്നു പറയുന്നതില്‍ ഒരു കാര്യവുമില്ല..ഇതു വഴി ആ നേരത്തെ പറഞ്ഞവനെ തൊഴിക്കാനുള്ള സംവിധാനം കൂടെ വേണമായിരുന്നു..